Evangelical Baptist Convention Lamka, Division 4 (East, West, North & South) a akikhen nung adinga Lamka West Division Naupang Khawmpi masapen, Gospel Centenary Hall, New Lamka ah October 10 & 11, 2026 sung zat in om hi. Khawmpi honna Rev. Pumsuanmung Naulak, DS Lamka West division in nei in, pawlkhen a kitaitehna tuamtuam leh Kisinsakna hun a zat ahi.
Kisinsakna hun ah, Dr. Niangsangching, Academic Dean, Grace Bible College in "Khrist Nungzui Bawl Un" chih thupi pansanin, Nungzui bawl dingte nungzui hih masak ding; Khrist khekhaap a zuih ding; Nungzui te chiamtehna leh Huntenga a gahsuang nungzui hih theihna ding toh kisai Laisiangthou tungtawna sinsakna nei hi.
Kitaitehnate ah Np. Abigail Lianching, Primary B in Painting ah khatna la a, Primary C ah Np. Jubilee Malsawmkimi in khatna leh Np. Mawithiankim in nihna la hi. Intermediate pawlte kitaitehna Choreography ah BCD Pearsonmun in khatna la hi. Pawlkhen a kitaitehna dang te, Junior pawl Bible Action ah 4na leh Senior pawl Lapawl ah 4na in kipanga, kipahman kila zoulou hi. Hiai khawmpi ah Pearsonmun apan sinsaktu 20 vel leh naupang 200 vel va kihel thei uhi.
Khawmpi beini nitak in, Missions motivation programme omsa toh thuah in TBUC makaih in khawmpi vaidawnna program kizanga, huai hunah Pastor in naupangte leh sinsaktute adinga thumsakna aneih banah, naupangten kitaitehna tuamtuam a ava telna te uh lahkhiakna nei ua, mipite mittai leh biltai takin hon koih uhi. Kikhop tawpin mipi ten vaidawnna singpi limtak ki dawnkhawm hi.
