A phamta G. Thongkhanthang leh Thawnniang apan gil a gah goutan 8-te lak a 8-na leh naupang pen ahi. Nisim 30th December, 1976 in Lungchin khua ah piang hi. Amah mi thumang, nu-leh-pa’ thu sellou leh U-te zahtak mi ahi.
Kum 1991 a pawl IV (Calss-IV) a sinlai in Evangelistic Week tungtawn in pianthakna kichiantak nei a, 14th June, 1998 in Baptisna Pastor V. Chinpau khut tungtawn a piak in om hi. Nisim 21st December, 2007 in Niangzasiam d/o Upa G. Thangkhosum toh Pastor Songkhothang khut ah Dansiangthou in kitenna nei uhi. Amau nupa kal a goutan 6, pasal 1 leh numei 5 Pathian apan Vualzawlna piak in om hi.
Lai simna lam ah Class ‘B’ – V tan Missions School Lungchin ah sin a, Class VI Singngat Hill Model ah sin in, class VII – VIII Rayburn High School ah zou hi. Class IX – X St. Paul’s Institute ah sin in, Class XI – XII Rayburn College ah zou hi.
Mission School a Pathian thu leh laa azak leh sinsak a omte tungtawn in a hinkhua khek lumlet in om hi. Khalam kikhekna tungtawn mah in Pathian gam nna hunbit a sep lunggulhna nei in kum 2003 in Grace Bible College (GBC) ah B.Th sin phalsakna piak a om bang in, B.Th kum thum (3) sung sin hi.
Kum 2006 in B.Th zou in, M.Div GBC ah sunzom nawn hi. M.Div a zil sung in Pastor Candidate thei ding in tel khiak in om a, 2007 in Pastor Assistant nna EBCC Vengnuam, New Lamka ah ginom leh muanhuai tak in sem hi. Nisim 9th December, 2007 Kumsim Khawmpi 59-na ah Ordination Rev. L. Khamkholun G/S khut tungtawn in piak in om hi. Kum 2008 in Kangkap Saptuam kem ding a mohpuakna piak in om a, kum 5 sung ginom leh muanhuai tak in Saptuam kem leh enkol hi. Heutute deihsakna leh lemgeelna tungtawn in M.Div sintheihna phalsak in om a, BSSI Bangalore ah M.Div kum 3 sung sin hi. Kum 2016 in EBCC Pearsonmun Saptuam kem ding a mohpuakna piak in om a, tuni tanpha in ginom leh muanhuai tak leh Pathian in hihtheihna a piak bangbang toh kem leh enkol hi. January 2022 kum in EBCC Khominthang Saptuam kemding in ana kisuan hi.
