Pathian ompihna toh nisim 15th September, 2026 nitak 6:30 pm in EBCC Pearsonmun Biakinn ah TBUC makaih in department chih a committee member te paikhawm in Biakinn Project toh kisai kikup khawmna hun zat in om hi.
Hiai hun Upa N Johnson Secretary, TBUC in hon makaih a , hunpatna thumna Nu Dimkhanniang President, TBDC in nei a, Keynote Address Upa T Khamzamuan Local Chairman, TBUC in a gen banah Media Team te a pan in Biakinn lamdan tuamtuam lim lahna leng om hi.
Ngaihdan tuamtuam gen na hun ah Biakinn in a huamkhak dite, a size ding, design, capacity, budget, architect zat / zat louh ding leh sum le pai bang chi zon ding chih leh a dangdang genkhawmna neih in om hi. Kikupkhawmna hun neih zoh ahih in Pastor Dr. Tunson Tunglut Local Pastor, EBCC Pearsonmun in hanthawnna thu genna hun zang a, thumna in hunkhakna nei hi.
Paikhawm teng in Pastor makaih in " Thou ni in lam ni" ( Nehemia 2:18) ," Halleluiah Amen! " chi in slogan kisam khawm a huaizawh in limlakna leng kinei hi.
A biakbuk ding lam thei ngei ding in saptuamte Pathian in hon makaih in hon vualzawl hen!
